रानाथारू भाषाका फगुनी र सबेरो विमोचित

0
425

काठमाडौँ : संघीय सांसद नारदमुनि रानाले रानाथारू भाषाको उपन्यास ‘फगुनी’ र ‘सबेरो’को धनगढीमा बिहीवार विमोचन गर्नुभएको छ ।

सांसद रानाले उपन्यासमा रानाथारू समुदायको कला, संस्कृति र भाषाको चित्रण गरिएको बताउनु भयो । समाजमा विद्यमान कुरीति उजागर गर्दै भाषाको संरक्षणमा पनि टेवा पुग्ने आशा व्यक्त गर्नुभयो । यो उपन्यासले रानाथारूको आधुनिक जीवन शैली समेटकोले यो उपन्यास एउटा ऐतिहासिक दस्तावेज भएको बताइएको छ ।

नेपाल रानाथारू समाजले फगुनी रानाथारू भाषाको पहिलो उपन्यास भएको जानकारी दिएको छ । नेपालमा कैलाली र कञ्चनपुरमा रानाथारूको बसोवास रहेको छ ।

कार्यक्रममा सुदूरपश्चिम प्रदेशसभा सदस्य श्यामलाल रानाले उपन्यासको समीक्षा गर्दै फगुनीले रानाथारू समाजको वास्तविक सामाजिक परिवेश उतार्न सफल भएको बताउनु भयो । त्यस्तै नेपाल रानाथारू समाजका अध्यक्ष संविधानसभा सदस्य कृपाराम रानाले उपन्यासको प्रमुख पात्र फागुन महिनामा जन्मेको हुँदा यसको नाम फगुनी राखिएको स्पष्ट पार्दै यसले रानाथारू संस्कृतिको महत्त्वपूर्ण पाटोको उल्लेख गरेको चर्चा गर्नुभयो ।

कार्यक्रममा कृष्णपुर नगरपालिकाकी उपप्रमुख रमिता बडायकले फगुनी उपन्यासले रानाथारूका ठेट शब्दहरू संकलन गरेको र यसले भाषा संरक्षणमा ठूलो योगदान पुर्‍याएको बताउनु भयो ।

रानाथारू समाजद्वारा प्रकाशित उपन्यास ‘फगुनी’का लेखक पदम राना हुनुहुन्छ । त्यस्तै ranatharu.com सञ्चालन गर्दै आएको आँगनबारी मिडिया प्रालिद्वारा प्रकाशित अर्धवार्षिक पत्रिका ‘सबेरो’का प्रकाशक सम्पादक नन्दलाल राना हुनुहुन्छ ।

कार्यक्रममा सूदूरपश्चिम साहित्य समाजका उपाध्यक्ष तीर्थराज पाण्डे, राजकुमार राना, बन्धुसिंह बडायकलगायतले बोल्नुभएको थियो । कार्यक्रममा दिवारीको शुभकामना आदानप्रदान पनि गरिएको थियो । रानाथारू भाषामा तिहारलाई दिवारी भनिन्छ ।

 

LEAVE A REPLY

Please enter your comment!
Please enter your name here